Асхат Тағыберген: «Мансабымды 37 жасымда аяқтаймын»

Балауса ЖАҚСЫБАЙ

Қазақстан ұлттық құрамасының капитаны Асхат Тағыберген – табандылығы мен еңбегінің арқасында танылған футболшы. Журналист Динара Сатжанға берген сұхбатында ол мансабы мен болашақ жоспарлары туралы айтты, деп жазды KazFace.kz тілшісі.

Асхат Тағыберген футболдағы кәсіби мансабын 2008 жылы туған жерінің клубы – "Қайсарда" бастады. Бүгінде ұлттық құраманың маңызды ойыншыларының бірі ретінде танылған ол бұл дәрежеге өз табандылығы мен еңбегінің арқасында жетті. Балалық шағында футболдан бөлек, бокс пен күреске де қызыққан Асхат кейіннен доп тебуге деген құштарлығын ерекше сезініп, осы спорт түріне түбегейлі бет бұрды. Ол алғашқы футболға деген махаббатын былай еске алады.

“Жеті жасымда футболға келдім. Аулада доп тебуден басталды, кейін үйдің жанындағы футбол секциясына жазылдым. Алғашқы жарысымда ең көп гол соғып, маған қабырғаға ілетін сағат сыйлады. Бұл мен үшін үлкен мотивация болды.”

Кәсіби деңгейдегі жаттығуларға 15 жасынан бастап қатыса бастаған ол, бастапқыда ешқандай команда құрамына алынбағанымен, өз бетінше жаттығып, еңбектен тынбай, ақыры кәсіби футболшы атанды. Бүгінде Асхат Тағыберген – Қазақстан ұлттық құрамасының капитаны. Бұл тек алаңдағы емес, команда ішіндегі тәртіп пен ұйымшылдықты да бақылау деген сөз.

"Әр ойыншыға өз әдісімен қарау керек.Әр ойыншының өз бағасы бар.  Бапкерлер қойған талаптарды сақтап, тәртіпті қамтамасыз етсек, нәтиже де жақсы болады. Футболда өзіміздің қалыптасқан ережелеріміз бар. Үлкендер жастарға үлгі көрсетіп, қажет болғанда қатаң талап қоямыз. Бірақ эмоцияға толы ойын барысында да бәрін дұрыс қабылдау маңызды.", деп бөлісті футболшы.

Асхат өзінің футболдағы мансабын шамамен 37 жасқа дейін жалғастыруды жоспарлап отыр. Оның айтуынша, әр футболшы мансап ұзақтығын денсаулығы мен дайындығына қарай өзі шешеді.

"Самат Смақов 37 жасқа дейін ойнады, ал Криштиану Роналду 40 жасқа дейін алаңда жүр. Әркім өз мүмкіндігіне қарай шешім қабылдайды. Мен де футболдағы тәжірибемді Қазақстан футболының дамуына жұмсауды жоспарлап жүрмін.", - деді ол.

Асхат – тек футболшы ғана емес, қаржы, спорт және футбол менеджменті салаларында үш жоғары білімі бар маман. Сондықтан ол болашақта кәсіби білімі мен тәжірибесін ел футболының өркендеуіне бағыттауды көздейді. Асхат Тағыберген – үлгілі отбасы иесі. Ол жұбайы Махаббатпен 12 жылдан бері бірге. Олардың үш баласы бар. Ұлы футболмен айналысып, әкесінің жолын қуып келеді, қызы кәсіби жүзумен айналысады, ал кенже қызы әлі үш жаста.

Футболшы  кәсіби мансабын аяқтаған соң да, Қазақстан футболының дамуына үлес қосуды мақсат етіп отыр.