Жаңалықтар
8-го марта 2024 г. 18:48
25 жасар көпбалалы ана күміс алқа иегері атанды
Дильназ МУРЗАГАЛИЕВА
Астаналық Ажар Қабитова жуырда үшемді дүниеге әкеліп, 6 баласы бар батыр ана атанды, деп хабарлайды KazFace.kz.
Көпбалалы отбасының тұңғыш қыздары небәрі 4 жаста, 2022 жылы туған егіздері екіге қаңтарда ғана толды, ал үшем қырқынан жақында ғана шықты.
Бүгінде Күміс алқа иегері атанып отырған жас ана көпбалалы боламын деп мүлдем ойламадым дейді
“Әрине ол біз үшін үлкен шок болды, егіз сосын үшем. Аралары кішкентай болды. Дәрігерлер көп жаман прогноз қойды. Бір кесареводан кейін екіншісіне шыдамайсың деді”, - дейді батыр ана.
Жас отбасы тұңғыш қыздарын бала-бақшаға енді ғана берген екен. Ал қалған 5 балаға қарау әрине жалғыз адамға қиынға түседі. Сондықтан Ажарға анасы мен жолдасы көмектеседі екен.
“Түнде күйеуім көмектеседі, таңертең мамам көмектеседі. Үшеуміз үш сменге бөлініп, жан-жақтан қарап үлгөреміз”, - деп бөліседі Ажар.
Дегенмен Ажар үшемге аяғының ауыр болғанын білмей тұрып, қатерлі ісік пайда болды ма деген үрейдің болғанын айтады. Алайда керекті анализдердің барлығын тапсырып болған соң, үшемге аяғы ауыр екенін естіп қатты қуанғанын айтады.
"Сол уақытта менде онкология деп ойладым. Дүрбелеңге салынып, көз жасыма ерік бердім. Күйеуіме қоңырау шалып, қорқынышты диагноз болып жатқанын айттым. Себебі шаршау, тітіркену, менструальдық циклдің ауысып кетуі, мұның барлығы бір уақытта болды. Күйеуім бірінші анализ тапсырып, УДЗ-ға (УЗИ) түс деп айтты. Күдігіміз теріске шығып, ультрадыбыстық аппаратта үш эмбрионды көрсетті. Күйеуім екеуміз тез арада анализ жасайтын емхананы тауып, бірден сол жаққа жол тарттық. Дәрігер маған "Құттықтаймыз, аяғыңыз ауыр!" деп хабарлады. Келесі аптада балалардың жүрек қағысын естуге келіңіз деп айтты”, – деп еске алады жас ана.
Алайда гинеколог дәрігер егіздерден кейін аз уақыт ішінде үшемді дүниеге әкелу өте қауіпті екенін түсіндіріпті. Тіпті, түсік жасату керектігін жасырмай айтқан. Дегенмен, анализ қорытындылары жақсы болғандықтан, барлығы жақсы болатынына сеніпті жас отбасы.
Айтқандай-ақ, балалар аман-есен дүниеге келді. Бүгінде 6 баланың ата-анасы атанып отырған жас отбасы бақытты өмір сүруде.
Айта кетейік, үйде бала күтімімен жүргеніне қарамастан, жас ана Ажар Қабитова қолқусырып бос отырған жоқ. Ол сүйікті ісімен айналысады. Нақтырақ айтқанда, өзі сияқты жас аналарға арнап инстаграм желісінде блог жүргізеді. Қазіргі таңда оның 30 мыңнан астам оқырманы бар. Аналар Ажардың посттарының астында жылы лебіздерімен жиі бөлісіп отырады.