Қоғам
18-го июня 2024 г. 22:25
Дана Нұржігіт: Сот залында тұрамын дегенді кім білген?!
Балауса ЖАҚСЫБАЙ
Танымал журналист, сенатор Дана Нұржігіт екінші некесінің сәтсіз болғанын айтып, басынан өткен жағдайдың мән-жайын түсіндірді, деп хабарлайды Kazface.kz.
Экс сенатор екінші некеге жеті жыл бұрын тұрған. Еске салсақ, бұған дейін Дана Нұржігіт танымал журналист Владимир Рерихпен отбасын құрған. Бүгінде олардың бір ұлы бар. Кейіннен он бес жыл отасқан жұбайлар дәм-тұзы жараспаған соң 2015 жылы заңды түрде айырылысып кеткен.
"Тұтқиылдан келген жау болса, мейлі, ал жан тәніңмен берілген жарың сатқындық жасаса ше?», деп бірінші жарының сатқындық жасағаны туралы көпшілікке ашып айтқан еді. Осы жолы да журналист үнсіз қалмады.
“Әйелдерге қарсы зорлық-зомбылық тақырыбы мені де айналып өтпеді. Жәбірленушінің орнында болып, сот залында тұрамын дегенді кім білген?! Қиындық кімде жоқ. Мен де мойымай, бастысы денсаулығым мен жұмысымнан айырмасын” деген едім. Алайда моральдық-психологиялық қысым алдымен денсаулығыма кері әсерін тигізді. Содан кейін ТВ-да жұмыс істей алмайтын жағдайға жеттім. Басшыға өзім барып, жұмыстан кететінімді айттым. Өйткені түске дейін тергеушінің алдында, түстен кейін тікелей эфирде жұмыс істеуге жарамай қалдым.
Екінші некем баянсыз болып, тоғыспайтын жерден М.Ә. есімді азаматпен мәмілеге келіп, адамша екі жаққа кетудің орнына іс насырға шауып, жабық есік жағдайындағы сот процесіне жетті. Іс 10 айға созылып, тергеу процесінен өттім. Соңғы нүктесі 28 мамырда қойылды. Үкім 13 маусым күні күшіне енді. Істің мән-жайын ашпауға қолхат беріп, уәделестік. Сол үшін артық нәрсе жазбаймын.
Иә, заңды түрде қорғануға мәжбүр болдым. Бір шешімге келерміз деп жүргенде істің арты осынша уақытты алады деп ойламаппын. Жұмыс пен үйдің, баламның берекесі қашты. Қаржылық шығын, жүйкенің тозуын айтпай-ақ қояйын. Бұл оқиға мен үшін үлкен сабақ болды. Әлімнің әкесіне дейін қолдап, “Сақ бол!” деп маған қорған болуға тырысты, жарықтық”, – деп жазды тележурналист.