Заң мен тәртіп: Қазақстандағы құқықтық реформалардың жүзеге асуы

Президент Қасым-Жомарт Тоқаевтың 2024 жылғы жолдауында әділетті Қазақстанды құрудың негізгі қағидаты ретінде «Заң мен тәртіп» тұжырымы айқындалды. Бүгінде бұл бағытта мемлекет ауқымды шаралар қабылдап, құқықтық жүйені жетілдіру, азаматтардың қауіпсіздігін қамтамасыз ету және құқық бұзушылықтың алдын алу бойынша нақты нәтижелерге қол жеткізіп отыр, деп хабарлайды KazFace.kz.

ҚР ішкі істер министрлігі қалалар мен ауылдарда қауіпсіз ортаны қалыптастыруға ерекше назар аударып отыр. Қазіргі таңда күн сайын 14 мыңнан астам полиция қызметкері мен Ұлттық ұлан әскери қызметшілері қоғамдық тәртіпті күзетуде. Ел бойынша 15 мыңнан астам патрульдік маршрут әзірленген, бұл барлық проблемалы аймақтарды қамтуға мүмкіндік берді.

Министр Ержан Сәденовтің айтуынша, алдын алу шараларының нәтижесінде биылғы жылы қылмыстар саны едәуір азайған.

«Қылмыстар 13%-ға төмендеді, бұл өткен жылмен салыстырғанда 9 мыңға аз. Кісі өлтіру, қарақшылық, тонау, бұзақылық және ұрлық деректері азайды. Бұрын сотталғандардың да құқық бұзушылықтары азайып, қылмыстың ашылу көрсеткіші жақсарды», – деді ол.

Жыл басынан бері 10 мыңнан астам қылмыс ашылып, 10 млн-ға жуық әкімшілік құқық бұзушылықтың жолы кесілді.

Мемлекеттің басты басымдықтарының бірі – қоғамның ең осал тобы саналатын әйелдер мен балалардың қауіпсіздігі. Осы мақсатта Ішкі істер министрлігінде тұрмыстық зорлық-зомбылыққа қарсы күрес жөніндегі арнайы басқарма құрылды.

Жаңа заңнамалық өзгерістерге сәйкес, ұріп-соғу және денсаулыққа қасақана жеңіл зиян келтіру қылмыстық сипатқа ие болды. Биылғы жылдың алғашқы жеті айында тұрмыстық зорлық-зомбылық бойынша 8 мыңнан астам қылмыстық іс тіркелді.

Соттар 56 мыңнан астам қорғау нұсқамасын шығарып, 19 мыңнан астам құқық бұзушы әкімшілік қамауға алынды. Мыңдаған әйелдер мен балаларға дағдарыс орталықтарында көмек көрсетілді. Бұл – мемлекет тарапынан нақты қолдау көрсетіліп жатқанын айғақтайды.

Әділет министрлігі азаматтардың құқықтары мен бостандықтарын қорғауға басымдық беруде. Жаңа реформалар кемсітушілікке қарсы іс-қимылға, халықтың осал топтарын қолдауға және әділ сот төрелігін қамтамасыз етуге бағытталған.

«Әділ заңдарды қабылдау жеткіліксіз, олардың сапалы орындалуын қамтамасыз ету қажет. Азаматтар сот төрелігіне сенімді болуы тиіс. Бұл – «Заң мен тәртіп» тұжырымдамасының басты талабы», - деді  министрлік өкілі Ерлан Сәрсембаев.

ІІМ мен әділет министрлігі қолға алған шаралар мемлекет құрып отырған «Заң және тәртіп» бірыңғай жүйесінің негізін қалап отыр. Бұл жүйе заманауи технологияларды қолдануға, заңнаманы жетілдіруге, қоғамның белсенді қатысуына және құқық бұзушылардың қатаң жауапкершілігіне сүйенеді.

Мемлекеттің басты міндеті – құқықтық тәртіпті уақытша шара ретінде емес, қоғамның күнделікті өмір сүру нормасына айналдыру. Қазақстан бүгінде осы бағытта сенімді қадам жасап, азаматтардың сенімін нығайтып, елдің болашағы үшін берік құқықтық негіз қалап келеді.