Қазақстанда әскерге шақырудың жаңа ережелері енгізілді

Қазақстанда әскерге шақыру жүйесі жаңарды. 16 қыркүйектен бастап SMS-хабарламалар қағаз повесткалармен бірдей заңды күшке ие болады. Бұл туралы Қорғаныс министрлігі мәлімдеді, деп хабарлайды KazFace.kz.

Жаңа ережеге сәйкес, шақырылушыларға SMS-хабарлама үш күн бұрын жіберіледі. Онда азаматтың әскери комиссариатқа келу күні мен уақыты көрсетіледі. Алдымен шақырылушы медициналық тексеруден өтеді, содан кейін әскерге жарамдылық туралы шешім шығарылады.

Хабарламалар азаматтың eGov порталына жеке кабинетіне де жолданады. Егер бір адамның бірнеше телефон нөмірі болса, SMS барлығына жіберіледі. Бұл повестканы өткізіп алмауға мүмкіндік береді.

Ал егер азаматтың нөмірі тіркелмеген болса, шақыру қағаз түрінде қолхатпен немесе пошта арқылы беріледі. Оны әскери комиссариат қызметкерлері, ұйым басшысы немесе пошта курьеры жеткізеді. Қорғаныс министрлігі қағаз повесткалардан толық бас тартпайтынын атап өтті.

Жаңа ереже gрезиденттің шілде айында қол қойған заң өзгерістеріне сәйкес енгізіліп отыр. Құжатта әскерге шақырудың бірыңғай тәртібі бекітілген.

Биыл күзгі әскерге шақыру науқаны 1 қыркүйектен 31 желтоқсанға дейін өтеді. Бұған дейін ол 1 қазанда басталатын еді, алайда жаңа ережелерге байланысты мерзім алға жылжыды.