Ұшақта ет пен балықты тасымалдауға бола ма?

Жолаушылар арасында жиі туындайтын сұрақтардың бірі – ұшақта мұздатылған ет пен балықты алып өтуге бола ма? Бұл мәселеге қатысты Қазақстандық әуе компаниялары Tengri Travel редакциясына жауап берді , деп хабарлайды KazFace.kz

SCAT компаниясының  баспасөз қызметі мұздатылған ет пен балықты, сонымен қатар шикі өнімдерді (қақталған, тұздалған, ысталған) тек тіркелген багажда ғана тасымалдауға болатынын мәлімдеді. Бұл ретте бірқатар талаптар сақталуы тиіс.

• өнім кемінде үш қабат тығыз герметикалық қаптамада болуы қажет (полиэтилен, картон қорап немесе қағаз қаптама);
• қаптамасы бүлінген өнім қабылданбайды;
•  ет пен балық міндетті түрде мұздатылған күйде болуы тиіс;
• қол жүгінде мұндай өнімдерді алып өтуге тыйым салынады;
• транзиттік немесе трансферлік багаж құрамында ет пен балықты рәсімдеуге рұқсат жоқ.

Сонымен қатар, компания ашытылған сүт өнімдерін (қымыз, айран және т.б.) ұшақпен тасымалдауға болмайтынын атап өтті. Тек балалар тағамы мен медициналық көрсетілім бойынша арнайы диеталық өнімдерге ғана рұқсат беріледі.

Air Astana компаниясы да мұздатылған өнімдерді тасымалдау тәртібін түсіндірді. Әуе компаниясы ет пен балықты бірнеше қабат қағазға орап, қосымша полиэтиленге салуды ұсынады. Бұл ағып кетуді болдырмау үшін қажет.

Компанияның айтуынша, Қазақстан ішінде дайын тағамдарды тасымалдауға рұқсат етіледі, бірақ олардың қаптамасы мықты болуы тиіс. Ал өткір иісті өнімдерді алып өтуге шектеу қойылған.

Шетелге шыққанда әр елдің өз ережелері бар. Сондықтан жолаушыларға сапар алдында баратын елдің азық-түлік өнімдерін әкелу талаптарымен алдын ала танысып алған жөн.

Айта кетейік, жуырда Қазақстанның барлық әуежайларында (Алматыны қоса алғанда) тәркіленген заттарды сақтау қызметі тоқтатылды. Енді тыйым салынған заттар иесіне қайтарылмайды, тек рейске шығарып салушыларға берілуі мүмкін.

Сондықтан ережелермен алдын ала танысу жолаушыларға уақыт пен қаржысын үнемдеуге көмектеседі.