Қазақстанда спортшыларға діни көзқарасын ашық көрсетуге тыйым салынды

Қазақстанда Спорттық этиканың жаңа редакциясы бекітілді, деп хабарлайды KazFace.kz.

Жаңартылған талаптарға сәйкес, енді спортшылар, жаттықтырушылар, нұсқаушы-жаттықтырушылар және төрешілер:

• спорттық жарыстар мен марапаттау рәсімдері кезінде, сондай-ақ бұқаралық ақпарат құралдарымен жұмыс барысында Қазақстан құрамасының немесе өз спорттық клубының спорттық киімінде болуы тиіс;
• мемлекеттік рәміздерге — Елтаңба, Ту және Әнұранға — құрметпен қарауға міндетті;
• Әнұранның мәтіні мен музыкалық нұсқасын білуі тиіс және оны орындау кезінде этика нормаларын сақтауы қажет;
• төреші шешіміне құрметпен қарап, көпшілік алдында дауласуға жол бермеуі керек;
• басқа спортшыларға, көрермендер мен ұйымдастырушыларға құрметпен қарауы тиіс.

Сонымен қатар, құжатта тыйым салынатын әрекеттер де нақты көрсетілген. Атап айтқанда, спорттық ортада:

• жаттығу процесіне қатысты ақпаратты жариялауға;
• бейәдеп сөздер мен ым-ишара қолдануға;
• жарыстың өтуіне кедергі келтіретін немесе елдің имиджіне нұқсан келтіретін әрекеттерге;
• қандай да бір тұлғаға қоқан-лоққы жасауға;
• команда ішінде діни сенімдерін ашық көрсетуге және өзгелерді діни бірлестіктерге тартуға қатаң тыйым салынады.

Бұдан былай барлық спортшылар мен жаттықтырушылар Спорттық этикамен жазбаша түрде танысуы тиіс. Сондай-ақ спорттық ұйымдарда бұл құжаттың мәтіні көрнекі жерге орналастырылуы қажет.