Кезекті социологиялық зерттеулер сайлаушылардың белсенділігі жоғары екенін және партиялық таңдаудың айқындала түскенін көрсетті, деп хабарлайды KazFace.kz.
Қазақстан Республикасы Президентінің жанындағы Қазақстан стратегиялық зерттеулер институты (ҚСЗИ) 2026 жылғы 13 маусым мен 17 тамыз аралығында жүргізілген жеті социологиялық зерттеудің нәтижелерін қорытындылады.
Зерттеу деректеріне сәйкес, қазақстандықтардың 70,3%-дан 75,6%-ға дейінгі бөлігі 23 тамызда өтетін Құрылтай сайлауына қатысуға ниетті екенін білдірген. Бұл сайлау науқаны барысында азаматтардың дауыс беруге дайындығы тұрақты жоғары болғанын көрсетеді.
Сонымен қатар сайлаушылардың партиялық таңдауы да айқындала түскен. Соңғы екі айда партияға қатысты нақты шешім қабылдамаған азаматтардың үлесі 22,6%-дан 5,3%-ға дейін төмендеген.
Сауалнама нәтижелерінде «Әділет» партиясы көш бастап тұр. Оның көрсеткіші алғашқы зерттеудегі 54,2%-дан соңғы зерттеулердің бірінде 70,3%-ға дейін өскен. Екінші орында «Ауыл» партиясы орналасып, оның көрсеткіші 5,1-7,3% аралығында болған.
Сонымен қатар үшінші және төртінші орындар үшін «Ақ жол» мен Respublica партиялары арасында, ал келесі позициялар үшін Қазақстанның Халық партиясы мен ОСДП арасында бәсекелестік сақталуда.
Зерттеулер азаматтардың сайлау туралы ақпараттану деңгейінің де жоғары екенін көрсетті. Соңғы сауалнамаға сәйкес, респонденттердің 89,4%-ы 23 тамызда өтетін сайлау туралы хабардар.
Сарапшылардың пікірінше, сайлауға жақындаған сайын азаматтардың таңдауы нақтыланып, электоралдық картина айқындала түскен.
Осылайша, 23 тамыздағы Құрылтай сайлауы азаматтардың саяси үдеріске қатысуы мен жаңа саяси мәдениетті қалыптастырудағы маңызды кезеңдердің бірі болмақ.
