Қазақстан инвесторлардың құқығын қорғауды күшейтуде

Қазақстанда инвестициялық ахуалды жақсарту және инвесторлардың құқықтарын қорғау бағытындағы жұмыстар жүйелі түрде жалғасуда. Мемлекет шетелдік капиталды тартумен қатар, кәсіпкерліктің қауіпсіздігін қамтамасыз етуге және ұйымдасқан қылмысқа қарсы күресті күшейтуге басымдық беріп отыр, деп хабарлайды KazFace.kz

Президент Қасым-Жомарт Тоқаев инвесторлардың құқықтарын қорғау мен қолайлы инвестициялық орта қалыптастыру елдің негізгі міндеттерінің бірі екенін бірнеше рет атап өткен. Бүгінде Қазақстан экономикасына тартылған таза тікелей шетелдік инвестициялардың жинақталған көлемі 150 миллиард АҚШ долларынан асып, ел Орталық Азиядағы инвестиция тарту бойынша көшбасшылық орнын сақтап келеді.

2025 жылдың қорытындысы бойынша Қазақстанға тартылған тікелей шетелдік инвестиция көлемі 20,5 миллиард АҚШ долларын құрап, алдыңғы жылмен салыстырғанда 14,5 пайызға өсті. Сарапшылар мұны инвестициялық саясаттың тиімділігімен және жүргізіліп жатқан реформалардың нәтижесімен байланыстырады.

Соңғы жылдары инвестициялар тек шикізат секторына ғана емес, өңдеуші өнеркәсіпке, энергетикаға, көлік-логистика саласына және жоғары технологиялық өндірістерге де белсенді бағытталуда. Әсіресе Қазақстан мен Қытай арасындағы инвестициялық ынтымақтастық қарқынды дамып, Қытайдың елімізге салған жиынтық инвестиция көлемі 29 миллиард АҚШ долларынан асты.

Сонымен қатар мемлекет бизнесті қылмыстық қысымнан қорғау шараларын күшейтіп келеді. Прокуратура органдары инвесторлардың құқықтарының сақталуын тұрақты бақылауда ұстап, инвестициялық прокурорлар кәсіпкерлердің өтініштерін қарап, заңсыз араласу мен рейдерлік әрекеттердің алдын алу бағытында жұмыс жүргізуде.

Құқық қорғау органдары ұйымдасқан қылмыстық топтарға қарсы күресті де жалғастырып келеді. Соңғы уақытта бірқатар өңірде кәсіпкерлерден ақша бопсалаумен және заңсыз кәсіпкерлік қызметпен айналысқан қылмыстық топтардың әрекеті тоқтатылып, кінәлілер сот жауапкершілігіне тартылды.

Үкімет инвестициялық заңнаманы жетілдіруді, мемлекеттік қызметтерді цифрландыруды, әкімшілік кедергілерді азайтуды және бизнесті қорғау тетіктерін күшейтуді жалғастыруда. Бұл шаралар Қазақстанда қауіпсіз, ашық әрі болжамды бизнес-орта қалыптастырып, елдің халықаралық инвестициялық тартымдылығын одан әрі арттыруға бағытталған.