Қостанайда «Кондитерлік астана» жаңа технологиялық кешені іске қосылды

Қостанайда тамақ өнеркәсібіндегі ірі инвестициялық жобалардың бірі – «Баян Сұлу» АҚ-ның «Кондитерлік астана» жаңа технологиялық кешені іске қосылды. Жобаға салынатын инвестиция көлемі жоспарланған кеңейту жұмыстарын ескергенде 20 млрд теңгеге дейін ұлғаяды, деп хабарлайды KazFace.kz

Жаңа өндірістік кешен кәсіпорынның жылдық қуатын 16,6 мың тоннаға арттырады. Жоба толық қуатына шыққан кезде «Баян Сұлу» жылына 68 мың тоннаға дейін кондитерлік өнім өндіруге мүмкіндік алады.

Өндірісте бисквит пен печенье өнімдерін шығаруға басымдық берілген. Сонымен қатар кәсіпорын отандық ауыл шаруашылығы шикізатын өңдеу көлемін арттырып, ішкі нарықтағы отандық өнім үлесін ұлғайтуға мүмкіндік алады.

Жоба аясында 260 жаңа жұмыс орны ашылады. Өндірістің кеңеюі жаңа жұмыс орындарымен қатар, шикізатты терең өңдеуге, экспорт көлемін арттыруға және өңірдің өнеркәсіптік әлеуетін күшейтуге жол ашады.

Қостанай облысының әкімі Құмар Ақсақаловтың айтуынша, мұндай жобалар өңірдің тамақ өнеркәсібін дамытуға және ауыл шаруашылығы өнімдерін терең өңдеу үлесін арттыруға мүмкіндік береді.

Бұдан бөлек, облыста агроөңдеу саласында бірқатар ірі жобалар жүзеге асырылуда. Қостанайда жылына 40 мың тоннадан астам макарон өнімдерін шығаратын зауытты іске қосу жоспарланған. Лисаковскіде қуаты жылына 350 мың тонна май экстракциялау зауытының құрылысы жүргізілуде. Рудныйда жылына 415 мың тонна астықты терең өңдейтін зауыт салу жоспарланған. Бейімбет Майлин ауданында қуаты жылына 300 мың тонна майлы дақылдарды сақтау және өңдеу кешені салынуда.

Жаңа жобаларды іске асыру нәтижесінде өңірдегі астықты өңдеу қуаты жылына шамамен 3 млн тоннаға дейін, ал майлы дақылдарды өңдеу қуаты 650 мың тоннаға дейін жетеді. Жалпы, облыстың өңдеуші кәсіпорындарының өндірістік қуаты 50 пайызға артады.

Бүгінде Қостанай облысы өңделген ауыл шаруашылығы өнімдерін экспорттау көлемі бойынша елімізде бірінші орында тұр. Жаңа жобалардың іске қосылуы өңірдің бұл бағыттағы позициясын одан әрі нығайтуға мүмкіндік береді.

Осылайша, «Кондитерлік астана» жобасы өндірісті ұлғайтумен қатар, отандық шикізатты терең өңдеу, жаңа жұмыс орындарын ашу, экспортты арттыру және өңір экономикасын әртараптандыру міндеттерін қатар шешуге бағытталған.