Жаңалықтар
17-го апреля 2024 г. 21:20
Қызғалдақ теріп, видео түсіргені үшін 11 миллион теңге айыппұл төлейді
Түркістан облысында полицейлер әлеуметтік желіге Қызыл кітапқа енген қызғалдақ гүлін қалай жұлып, жинап жатқаны туралы видео жариялаған бойжеткенді ұстады, деп хабарлайды KazFace.kz.
Ол жеке парақшасына Қызыл кітапқа енген қызғалдақ гүлін жұлып жатқан сәтін салған.
Құқық бұзушы 22 жастағы Ордабасын ауданының тұрғыны болып шықты.
"Осы факті бойынша әкімшілік хаттама толтырылды. Ол 11 миллион теңгеден астам айыппұл төлеуі мүмкін. Сирек кездесетін және жойылып кету қаупі төнген өсімдік түрлерімен заңсыз айналысу фактісі полицияда тіркелді. Барлық мән-жайлар анықталуда", – делінген хабарламада.
Полиция қызғалдақтарды тамашалауға келген тұрғындар мен қонақтарға Қызыл кітапқа енген өсімдіктерді жұлып алған жағдайда заңға сәйкес жазаланатындарын ескертеді.