Қазақстанда мектепке дейінгі білім беру саласына енгізілген ваучерлік қаржыландыру жүйесі 27 млрд теңгеден астам қаражатты үнемдеуге сеп болды. Бұл туралы президент көмекшісі Тамара Дүйсенованың төрағалығымен өткен жиында мәлім болды, деп хабарлайды KazFace.kz.
Аталған жүйе мемлекет басшысының 2024 жылғы 2 қыркүйектегі Жолдауын іске асыру аясында енгізіліп отыр. Жобаны еліміз бойынша толықтай іске қосу 2025 жылдың 1 тамызына жоспарланған. Қазіргі таңда 2 300-ден астам балабақша жобаға қатысып, 276,5 мың балаға ваучер берілген.
Пилоттық жоба алғашында Тараз, Шымкент, Түркістан, Орал қалаларында жүзеге асырылып, кейін Астана, Қарағанды, Өскемен, Семей, Жезқазған және бірқатар аудандарда жалғасты. Нәтижесінде кейбір өңірлерде балабақша кезегі толығымен жойылды.
Үнемделген қаражаттың 25 млрд теңгесі бұрыннан кезекте тұрған балаларды орналастыруға, 2 млрд теңгесі жаңадан тіркелген бүлдіршіндерге бағытталған.
Шымкент пен Қарағандыда кезек мәселелері қосымша қаралып, Ұлытау облысына жаңа мектепке дейінгі ұйымдар ашу тапсырылды.
