Өскеменнің лас ауасына қатысты өңір басшысы пікір білдірді

Өскемен қаласындағы экологиялық жағдай әлі де қиын. Бұл туралы Шығыс Қазақстан облысының әкімі Ермек Көшербаев Tengrinews.kz тілшісіне берген сұхбатында айтты,- деп хабарлайды KazFace.kz

Үкімет отырысында  Шығыс Қазақстан облысының әкімі Өскемен қаласындағы ауаның ластану мәселесі бойынша  қандай шаралар қабылданып жатқаны туралы айтты. Ермек Көшербаев қаладағы экологиялық ахуалға климаттық және антропогендік факторлардың әсер ететінін атап өтті. Қала тау шатқалында орналасқан, ал екі мұзсыз өзеннің болуы тұманның қалыптасуына ықпал етеді.

«Қандай аяз болса да, осы өзендер қатпайды. Температураның өзгеруіне байланысты тұман пайда болады. Сонымен қатар, қаладағы желдің болмауы да жағдайды қиындатады. Жыл бойында шамамен 180 күн желсіз күндер болады, оның 100-і ауа райының қолайсыз жағдайларына сәйкес келеді», – деді Ермек Көшербаев.

Әкімнің айтуынша, қалада бүгінгі күні 10 ірі кәсіпорын жұмыс істейді. Сонымен қатар, көлік құралдары мен жеке үйлерден шыққан түтін де ауаға зиянды заттар бөледі. Қалада жыл бойына жылу беру маусымы шамамен 200 күнге созылады, бұл да экологиялық жағдайға өз әсерін тигізеді.

Қазіргі уақытта Өскемен қаласында шамамен 49 мың тонна ластаушы заттар ауаға таратылады. Оның басым бөлігі өнеркәсіптік кәсіпорындар мен жылу электр орталықтарына тиесілі.

«Біз қала бойынша экологиялық жағдайды қадағалайтын  арнайы жүйе орнатуды ұйғардық. Бұл жүйе белгілі бір уақыт аралығында нақты динамиканы және қандай жағдайлар орын алып жатқанын көрсетеді. Біз климатқа әсер ете алмаймыз және тарихи орындарға орналасқан кәсіпорындарды басқа жерге көшіру мүмкін емес. Кейбір адамдар бұл кәсіпорындарды жабу керек деп айтады, бірақ бұл тек популизм ғана», – деп атап өтті облыс әкімі.

Көшербаевтың айтуынша, кәсіпорындар заманауи мониторинг және бақылау жүйелерін орнатуды жалғастырып, шығарындыларды азайтуға жұмыс істеуі тиіс.