Қызылжарда жас спортшы жаттығып жүріп көз жұмды

Әлеуметтік желіде футбол алаңында жаттығып жүріп, кенеттен құлап көз жұмған жігіттің видеосы кең тарауда. Осы орайда KazFace.kz тілшісі оқыс оқиғаның мән-жайын анықтады. 

Аталған жайт 16 қазанда Қызылжардағы футбол клубының кезекті жаттығуы кезінде болған. Кешкі сағат 20:04 шамасында Петропавл полициясына медициналық мекеменің қабылдау бөлімшесінен қаланың 18 жастағы тұрғыны қайтыс болды деген хабарлама түскен.

Футбол ойнау кезінде қала тұрғыны өзін жайсыз сезініп, көгалға құлаған. Факті ҚР Қылмыстық Кодексінің 001-бабы «Адамның қайтыс болуы» бойынша сотқа дейінгі тергеп тексерудің бірыңғай тізіліміне тіркелді. Сот медициналық сараптама тағайындалды. Істің барлық мән- жайын зерделеуге бағытталған сотқа дейінгі тергеу жүріп жатыр, – дейді СҚО полиция департаменті баспасөз қызметінің ресми өкілі Нұрбек Баекин.

Істің барлық мән-жайын зерттеуге бағытталған сотқа дейінгі тергеу жүріп жатыр. Оның нәтижелері бойынша түпкілікті процестік шешім қабылданатын болады.

Ал, футбол орталығының басшысы жаттығу кезінде спортшының кеудесіне доп тигені бейнежазбаға жазылғанын айтады. 

Ешкім де бұндай оқыс жағдайды күткен жоқ. Бала допты айналдырып жаттығып жүрген. Аяқ астынан есінен танып құлапты. Футбол алаңында бұрын-соңды дәл осындай жағдай болып көрмепті. Бірақ жігіттің кеудесіне доп тигені камераға жазылып қалған. Бірақ жас спортшы еш ауырсынбай әрі ойнап кете барған. Дегенмен оның өліміне осы соққы себеп болуы мүмкін деген болжам бар. Біз өз тарапымыздан барлық бейнежазбаны тергеушілерге бердік, – дейді «Қызылжар» футбол орталығының басшысы Вячеслав Колода.

Футболшының нақты неден көз жұмғаны әлі анықталып жатыр. Белгілісі, жедел жәрдем оқиға орнына төрт минутта келіп, оны облыстық балалар ауруханасына жеткізген. Ақ халаттылар өмірін сақтап қалу үшін екі сағат күрескенімен, көмектесе алмапты.

СҚО Денешынықтыру және спорт басқармасының берген мәліметі бойынша марқұм 18 жастағы Рауан Мұхтаров есімді азамат. Ол оқиға орын алған күні кешкілік қаладағы «Қарасай» стадионының қосалқы алаңында футбол жаттығуына қатысқан. 

Рауан 2005 жылы дүниеге келген. Ол Солтүстік Қазақстан кәсіби-педагогикалық колледжінің «Денешынықтыру және спорт» мамандығында 2-курс студенті. Жастайынан бокспен айналысып, бірнеше турнирде жеңімпаз атанған. 2022 жылдың шілде айынан бастап футболға түбегейлі бет бұрып, «Қызылжар» футбол орталығында жаттығып жүрген.