Қазақ қызы франциялық 100 келілік олимпиада чемпионы "Тедди аюды" жамбасқа салып лақтырды

Қазақстандық дзюдошы Әйгерім  Әбілқадырова оқу-жаттығу кезінде франциялық спортшы Тедди Ринерді жамбасқа салып жықты. Бұл туралы әлеуметтік желіде видео таралған.

Олимпиаданы үш рет жеңген және әлемнің 11 дүркін чемпионы франциялық дзюдошы Тедди Ринер қазақстандық спортшылармен бірге Алматыдағы жаттығу жиынында жүр. Ол ерлер құрамасымен ғана емес, әйелдер командасымен де спаррингтер өткізуде. 

Бойы 205 сантиметр, салмағы 100 келіден жоғары еңгезердей спортшыны қазақ қызы иығынан жамбасқа салып лақтыруы ел арасында қызу талқыланып жатыр. Желі қолданушылары қазақ қыздарының мықтылығын айтып, Әйгерімге Қажымұқан атасындай болсын деп тілек жазды.

Еске сала кетейік, Әйгерім Әбілқадырова дзюдодан Азия чемпионы (2011), грэплинг бойынша Қазақстаннан шыққан бірінші және әзірге жалғыз чемпион (2018).