Олжас Бектенов ірі кәсіпкерлерге декларация тапсыруға екі апта берді

Балауса ЖАҚСЫБАЙ

Премьер-министр Олжас Бектенов ірі компанияларды сынға алып, олардың бюджетке аударған салықтары нақты табыстарына сәйкес келмейтінін атап өтті, деп хабарлайды KazFace.kz.

Оның айтуынша, кейбір ірі құрылыс компаниялары, соның ішінде «Базис-А» мен BI Group, салық жүктемесін азайту үшін түрлі схемаларды қолдануда. Премьер-министр бұл компанияларға екі апта уақыт беріп, қосымша салық декларацияларын тапсыруды және әділ салық төлеуді талап етті.

Өткен жылы жүргізілген зерттеу бойынша, BI Group құрылыс компаниясы 300-ге жуық кәсіпорынды қамтиды, ал олардың мемлекеттік сатып алу көлемі 1 триллион теңгеге жуық. Таяуда BI Group құрамындағы «BI Global» компаниясы Алматыдағы Сац атындағы ТЮЗ-ді қайта құру жұмыстарына 21,8 миллиард теңге көлемінде тендер жеңіп алды.

Ал «Базис-А» құрылыс холдингі көптеген түрлі кәсіпорындарды біріктіреді, бірақ олардың есептіліктері көп жағдайда жарияланбайды. Беловичтер отбасының ең табысты активі — «Bazis Construction» компаниясы жақында атауын «Bcn Group» деп өзгертті. Компания 2015 жылдан бері 73,4 миллиард теңге салық төлеген, ал мемлекеттік сатып алулары 365 миллиард теңгеден асады.

Бұл жағдай елдегі  ірі компаниялардың салықтық тәртібін қайта қарауға түрткі болуда.