Наурызда қазақстандық спортшылардың асығы алшысынан түсті

Балауса ЖАҚСЫБАЙ 

Наурыз айы  қазақстандық ерлер спортында жарқын жетістіктермен есте қалды. Біздің спортшылар гимнастика, еркін және грек-рим күресі бойынша халықаралық жарыстарда жоғары нәтиже көрсетті, деп хабарлайды KazFace.kz.

Қазақстандық гимнастар Антальяда (Түркия) өткен Әлем кубогының кезеңінде екі медаль жеңіп алды. Нариман Құрбанов гимнастикалық ат снарядындағы жаттығуларда 14,634 балл жинап, алтын медаль иегері атанды. Бұл – оның Олимпиададан кейінгі алғашқы халықаралық жетістігі. Ал Зейнолла Идрисов күміс жүлдені қанжығасына байлады (14,300 балл). Үшінші орынды иорданиялық Ахмад Абу Аль Сауд (14,200 балл) иеленді. Сондай-ақ, Штутгартта (Германия) өткен халықаралық турнирде Идрисов тағы бір жеңіске жетіп, 14,066 балл жинап, алтын медаль иеленді.

Еркін күрес шеберлері Азия чемпионатында үлкен жетістікке жетті. 74 келіге дейінгі салмақта Нұрқожа Қайпанов финалда қырғызстандық қарсыласын 2:1 есебімен жеңіп, чемпион атанды. Осы турнирде Ризабек Айтмұхан (97 кг) күміс, ал Рахат Қалжан (57 кг) қола медальға ие болды. Сонымен қатар, Болат Сақаев (86 кг) финалда ирандық балуанға жол беріп, күміс жүлдеге қол жеткізді. Жалпы, еркін күрес құрамасы бес медальмен елге оралды.

Грек-рим күресінен де қазақстандық спортшылар үздік нәтиже көрсетті. Омар Сатаев (82 кг) пен Алимхан Сыздыков (130 кг) күміс медаль иеленсе, Ибрагим Магомадов (77 кг) және Шамиль Ожаев (87 кг) қола жүлде жеңіп алды. Бұл нәтижелер Қазақстанның грек-рим күресіндегі мықты дәстүрін тағы бір мәрте дәлелдеді.

Бокстан Софияда (Болгария) өткен "Странджа кубогында" қазақстандық спортшылар керемет нәтиже көрсетті. Ерлер құрамасы бес алтын, жеті күміс және төрт қола медаль жеңіп, жалпы есепте бірінші орынға шықты. Чемпион атанғандар қатарында Ертуған Зейноллин (63,5 кг), Торехан Сабырхан (67 кг), Абылайхан Жүсіпов (71 кг), Сабыржан Аққалықов (75 кг) және Бекзад Нұрдәулетов (86 кг) бар.

Әйелдер құрамасы да жақсы нәтиже көрсетіп, бір алтын, алты күміс және сегіз қола медальға қол жеткізді.

Таеквондодан Болгарияда өткен "Bulgaria Open" халықаралық турнирінде қазақстандық спортшылар 14 медаль жеңіп алды. Ерлер арасында 74 кг салмақта Максат Орынбасар алтын жүлдеге ие болды.
Су добынан Чжаоцинде (Қытай) өткен Азия чемпионатында Қазақстан құрамасы екі қола медаль жеңіп алды. Ерлер құрамасы үшінші орын үшін матчта Иранды жеңсе, әйелдер құрамасы топтық кезең нәтижесінде үздік үштікке енді.

Қарақолдың жас талантын үлкен сахна күтіп тұр. Абай облысының Қарақол ауылында ерекше қабілетімен көзге түскен жас талант өсіп келеді. Қуаныш Амангелді – көмеймен ән салу өнерін меңгерген дарынды оқушы. Қарақол ауылдық мектебінің 10-сыныбында оқитын ол бала кезінен домбыраға әуес болып, ұлттық өнерге ерекше қызығушылық танытқан.

Домбыра тембр класын тәмамдаған соң, Қуаныш көмеймен ән айтуды өз бетінше үйрене бастады. Дәстүрлі ән өнеріне терең бойлап, көмеймен айту техникасын жетілдіруге ерекше ден қойды. Оның бұл өнерге бейімділігін алғаш болып ұстаздары байқап, талантын дамытуға бағыт берді.

Табиғи дарыны мен ізденімпаздығы оның өнердегі шеберлігін одан әрі шыңдай түсті. Ол қазіргі уақытта да үнемі өз даусын жаттықтырып, әртүрлі халық әндерін орындау техникасын зерттеп келеді.

Өнер жолында ғана емес, білім саласында да биік мақсаттары бар. Қуаныш болашақта Семейдегі жоғары медицина университетіне түсіп, дәрігер болуды армандайды. Бұл жолды таңдауы – бала күнгі арманы мен адамдарға көмек көрсетуді өмірлік мақсаты деп білуімен тығыз байланысты. Дегенмен, ол өнерден де қол үзуді ойламайды, керісінше, оны өмірінің ажырамас бөлігіне айналдырмақ. Оның айтуынша, ұлттық өнерді насихаттау әрбір азаматтың парызы, сондықтан ол медицина саласында жүріп те дәстүрлі ән өнерін дамытуға үлес қосқысы келеді.

Жас өнерпаз спортқа да бейжай қарамайды. Волейболмен шұғылданып, облыстық және республикалық жарыстарға қатысып жүр. Ол үшін спорт – тек денсаулық кепілі ғана емес, мақсатқа жету жолындағы шыдамдылық пен табандылықты қалыптастыратын маңызды құрал. Өнер мен спортты қатар алып жүрген ол өзін жан-жақты дамытуды көздейді.

Қазіргі таңда Қуаныш түрлі байқауларға қатысып, тәжірибе жинақтауда. Болашақта үлкен сахнада өнер көрсетіп, Қазақстанның атын әлемге танытуды армандайды. Ол еңбек пен талпыныстың жетістікке жеткізетініне сенімді. Ұлттық өнерге деген сүйіспеншілік, білімге құштарлық, спортқа деген қызығушылық – осы үш қасиет оны биік белестерге жетелейтіні сөзсіз.

Қазақстандық дзюдошы Абылайхан Жұбаназар халықаралық Grand Slam турнирінде қола медаль жеңіп алды. Ол Ташкентте (Өзбекстан) өткен жарыста 81 кг салмақ дәрежесінде үшінші орынға ие болды. Қола жүлде үшін белдесуде Жұбаназар жапониялық Сотаро Фудживароны жеңіп, өзінің мықтылығын тағы бір мәрте дәлелдеді.

Қазақ спортшыларының наурыз айындағы жетістіктері – олардың таланты мен қажырлы еңбегінің жемісі. Алдағы уақытта да олар ел намысын абыроймен қорғап, жаңа белестерді бағындырарына сенім мол.