Нәрестеге хиджама жасағандар жауапқа тартылады

Ғаламторда нәрестенің маңдайын ұстарамен тіліп, қан алып жатқан видео кең тарады. Бұл жайт денсаулық сақтау минстрінің назарынан тыс қалмады. 

Министр Ажар Ғинияттың айтуынша, бұл халық арасында хиджама аталып кеткен дәстүрлі ем шарасы. Бірақ ол лицензияланған медициналық көмек емес. Бұндай әрекетке барғандарды жіті тексеріп, жауапқа тартады.

- Егер азаматтар қандай да бір медициналық көмек көрсетсе, оны лицензиялау керек. Бүгінгі таңда хиджама лицензияланған медициналық көмек түріне жатпайды. Сондықтан осы жағдай комитетте талқыланып, тергеу жүргізіледі. Ал «Қазақстанда хиджамаға тыйым салына ма?» деген сұраққа келсек, бұл жерде мен үшін мамандардың пікірі өте маңызды. Мен оларға халықаралық тәжірибелерді зерттеуді тапсырдым. Бұл сұрақты қарастырамыз, - деді министр. 

Балаға ем жасаған маман болса, мұның қауіпсіз екенін, мемлекеттік рұқсат қағазы барын және көптеген аналардың риза екенін жазады.

- Бұл баяғыдан бар нәрсе, әсіресе Батыс Қазақстан мен қырғыз халқы мұны жақсы біледі. Ал басқа өңірлер білмегендіктен, үрки қарап, жаман пікір жазуда. Қазақша қой ауруы деген –  гипоксия, гипер-гипотонус, рахит аурулары. Ем-шара қан айналымын жақсартады. Осыған дейін қанша балаға жасалды, біреуі жарақат алып, зақым көрмеген, керісінше аналары баланың жақсарғанын айтып, алғыс білдіруде, – деп жазды хиджама емдік орталығының маманы Рабиға Раушанқызы.

Аталған әрекетке байланысты қоғамда үлкен дау туды. Әлеуметтік желі қолданушылары бұл емнің нәрестеге жасалуы қатыгездік екенін жарыса жазды. Ал, Атырау облысы полиция департаментінің баспасөз қызметі бұл факті бойынша тергеу жұмыстары басталғанын жеткізді.