Миллиардтарды жымқырған бухгалтер

Талдықорған қалалық білім бөлімінің бас есепшісі 1 миллиардқа жуық қомақты қаражат жымқырды, деп хабарлайды KazFace.kz Антикорға сілтеме жасап. 

Сыбайлас жемқорлыққа қарсы іс-қимыл агенттігінің хабарлауынша, 48 жастағы әйелдің үйін тінту кезінде 942 млн. 902 мың теңгеден астам қаражат тәркіленген. Ұрланған ақшаның басым бөлігі шетелдік волютаға ауыстырылған. Бұдан бөлек, 14 пәтер, 7 коммерциялық нысан мен Лэнд Крузер 200 маркалы көліктің құжаттары табылды. Сонымен қоса, зергерлік бұйымдар да шыққан. 

Қазіргі таңда жалпы есепте 1 млрд. 200 млн. теңгеге бағаланған дүние-мүлікке уақытша шектеу қойылған. 

Бірнеше жылдан бері білім саласында жұмыс істемейтін адамдарға ақша аударып, бюджеттен бөлінген қаражаттарды қалтасына басып келген бас есепші мен бірге істеген орынбасары, бірнеше қызметкері қамауға алынған. 

Айта кету керек, өткен айда Талдықорғанда аурухана есепшісі 109 млн. теңгені жымқырып, құмар ойынға жұмсаған.