Қоғам
9-го июля 2024 г. 19:51
Бассейнде құлаған азаматша сотта жеңіске жетті
Балауса ЖАҚСЫБАЙ
Астаналық қонақ үйлердің біріндегі бассейнде жамбас мойнын сындырған әйел сотқа жүгінді,- деп хабарлайды KazFace.kz.
Азаматша емделу үшін кеткен материалдық шығын мен моральдық зиянның орнын толтыру үшін сотқа жүгінген. Жарақатына байланысты ол ұзақ уақыт емделіп, жұмыс істей алмапты.
Астананың азаматтық істер жөніндегі ауданаралық соты талапкердің бассейн ережелерінің талаптарына қайшы, резеңке аяқ киіммен емес, шүберек тәпішкемен келгенін анықтады.
"Бассейнге бару кезінде ондағы ережелер сақталмаған болса, әкімшілік ережелерін бұзған адамдарды бассейнге кіргізбеуге құқылы. Сот талапкердің бассейн аймағына арнайы резеңке аяқ киімсіз жіберілгенін, соның салдарынан тайып кетіп, құлап, дене жарақатын алғанын анықтады. Бұл қызмет тұтынушының денсаулығына зиян келтірген жауапкердің сапасыз қызмет жасауын көрсетеді", - делінген сот хабарламасында.
Сот әйелдің өзі ережелерді бұзуға жол бергенін де ескерді. Сондықтан моральдық зиянды өтеу туралы талап ішінара қанағаттандырылды - тек 50 мың теңгеге.
Қонақ үйден талап қоюшының пайдасына 1,1 миллион теңге айырылған табысы мен 160 мың теңгеден астам дәрі-дәрмек және авиабилет сатып алуға кеткен шығын өндірілді.