Қазақстан Республикасы парламенті мәжілісінің депутаттары Үкіметке еліміздің ішкі саясатына сыртқы күштердің ықпал етуіне қарсы нақты шаралар қабылдауды талап еткен депутаттық сауал жолдады, деп хабарлайды Kazface.kz.
Мәжіліс депутаттары бұл мәселені мемлекет басшысы Қасым-Жомарт Тоқаевтың Ұлттық құрылтайдағы мәлімдемесіне сүйене отырып көтеріп отыр.
Президент қазіргі әлемде ұлттық мүддені қорғау мен аймақтық саясаттың күшеюі басты орынға шыққанын атап өтті. Осыған байланысты Қазақстан да ішкі тұрақтылығын сақтап, сыртқы ықпалға жол бермеуі қажет.
Депутаттар еліміздің ішкі саясатына сыртқы араласудың бірнеше мысалын келтірді. Соңғы онжылдықта Қазақстанға USAID (АҚШ-тың Халықаралық даму агенттігі) арқылы 150 миллион доллардан астам қаражат бөлінген. Сонымен қатар, дәстүрлі құндылықтарға қайшы келетін идеологиялық қозғалыстар мен субъмәдениеттердің қаржыландырылғаны туралы деректер бар. Бұл ұлттық бірлікке қауіп төндіруі мүмкін. Осы ретте депутаттар нақты ұсыныстарын білдірді.
1. Қаржы министрлігі сырттан келетін қаражаттың мақсатты пайдаланылуын тексеруі тиіс.
2. Шетелден қаржыландырылатын ұйымдардың қызметін заң аясында реттеу қажет.
3. Шетелдік гранттар арқылы жүзеге асатын жобалардың ашықтығы қамтамасыз етілуі керек.
Президент тапсырмасына сәйкес, еліміздің ішкі саясатына арналған алғашқы Ішкі саясат тұжырымдамасы әзірленбек. Бұл құжат ұлттық құндылықтарды сақтай отырып, сыртқы ықпалдарға тосқауыл қоюға бағытталады.
Депутаттар Қазақстан өзінің ішкі саясатына сыртқы араласуға жол бермейтінін және бұл бағытта заң аясында нақты қадамдар жасалатынын мәлімдеді.
