1 сәуір Нұрғиса Тілендиевтің 100 жылдығы тойлануда

Бүгін қазақ музыкасының дара тұлғасы, композитор, күйші, дирижер, халық әртісі Нұрғиса Тілендиевтің туғанына 100 жыл толды, деп хабарлайды KazFace.kz.

Нұрғиса Тілендиев  ұлттық музыка өнеріне өлшеусіз үлес қосып, қазақ руханиятының алтын қорын қалыптастырған бірегей өнер иесі. 

1925 жылы Алматы облысында дүниеге келген Нұрғиса Тілендиевтің «Әлқисса», «Аққу», «Көш керуені», «Саржайлау» күйлері мен «Өз елім», «Құстар әні», «Әже туралы ән» сынды әндері халық жадында мәңгі сақталды. 1982 жылы композитор «Отырар сазы» оркестрін құрып, ұлттық музыканы жаңа белеске көтерді.

Ұлы композитордың 100 жылдығына орай елімізде ауқымды мәдени шаралар өтуде. 1 сәуірде Астанада «Әлқисса – Нұрғиса» концерті ұйымдастырылып, «Отырар сазы» оркестрі Тілендиевтің шығармаларын орындады. 2–4 сәуір аралығында елордада «Құстар әні» республикалық фестивалі өтеді.

Нұрғиса Тілендиевтің 100 жылдығы – ұлт өнерінің ұлы мерекесі. Оның мұрасы әлі талай ұрпақтың рухани азығына айналары сөзсіз.