1 мамырдан бастап жедел жәрдем қызметі өзгереді

1 мамырдан бастап Қазақстанда жедел жәрдем шақыруларын қабылдау тәртібі өзгереді, деп хабарлайды KazFace.kz.

Бұл туралы ҚР денсаулық сақтау министрлігінің 2025 жылғы 4 сәуірдегі №32 бұйрығында мәлім болды.

Жаңа ережеге сәйкес, 4-санаттағы шақырулар – яғни науқастың жағдайы шұғыл болмаса және өміріне тікелей қауіп төнбесе – жұмыс күндері сағат 08:00-ден 19:00-ге дейін және сенбі күні 08:00-ден 12:00-ге дейін емханаларға (ПМСП) жолданатын болады. Бұл уақыттан тыс түсетін шақыруларды жедел жәрдем бригадасы өзі орындайды.

Мақсат – жедел жәрдем қызметінің жүктемесін азайтып, шұғыл көмекті қажет ететін науқастарға дер кезінде жетуін қамтамасыз ету.

Шақыруларға қызмет көрсету уақыты:

• 1-санат – 10 минутқа дейін;
• 2-санат – 15 минутқа дейін;
• 3-санат – 30 минутқа дейін;
• 4-санат – 60 минутқа дейін;
• ПМСП мобильді бригадасы – 60 минутқа дейін.

Бұл жаңашылдық денсаулық сақтау жүйесінің тиімділігін арттырып, учаскелік қызмет пен жедел жәрдем арасындағы үйлесімділікті жақсартуға бағытталған.