Қарақолдың жас талантын үлкен сахна күтіп тұр

Балауса ЖАҚСЫБАЙ

Абай облысының Қарақол ауылында ерекше қабілетімен көзге түскен жас талант өсіп келеді. Қуаныш Амангелді – көмеймен ән салу өнерін меңгерген дарынды оқушы. Қарақол ауылдық мектебінің 10-сыныбында оқитын ол бала кезінен домбыраға әуес болып, ұлттық өнерге ерекше қызығушылық танытқан.

Домбыра — қазақ халқының төл аспабы, рухани болмысының айнасы. Қос ішекті, көп пернелі бұл аспап – ғасырлар бойы ұлтпен бірге жасап келе жатқан тарих шежіресі іспетті. Қуаныш осы қасиетті аспаппен алғаш танысқан сәттен-ақ, оның әуенінен туған жердің иісі мен бабалардың үні естілгендей күй кешкен. Ол домбыра үні арқылы өзін танып, өнерге жол ашқанын үнемі айтып жүреді.

Домбыра тембр класын тәмамдаған соң, Қуаныш көмеймен ән айтуды өз бетінше үйрене бастады. Дәстүрлі ән өнеріне терең бойлап, көмеймен айту техникасын жетілдіруге ерекше ден қойды. Оның бұл өнерге бейімділігін алғаш болып ұстаздары байқап, талантын дамытуға бағыт берді. Табиғи дарыны мен ізденімпаздығы оның өнердегі шеберлігін одан әрі шыңдай түсті. Ол қазіргі уақытта да үнемі өз даусын жаттықтырып, әртүрлі халық әндерін орындау техникасын зерттеп келеді.

Қуаныш үшін домбыра – тек аспап емес, сырласы, сенімді серігі. Ол әрбір күй мен әннің терең мағынасына үңіліп, тыңдарманға жүрекпен жеткізуге тырысады. Қуаныштың орындауындағы күйлер тыңдаушысын тербеп, алыста қалған ескі заманға жетелейтіндей әсер қалдырады. Ол қазақтың халық композиторлары – Тәттімбет, Дәулеткерей, Құрманғазы сынды тұлғалардың шығармаларын сүйіп орындайды. Әр күйнен ол тарихты, халықтың мұңын, қуанышын сезінеді.

Көмеймен ән айту – қазақ халқының бай музыкалық мұрасының бір бөлігі. Бұл өнер түрі негізінен түркі халықтарына тән болғанымен, қазіргі таңда ерекше дарын иелерінің арқасында қайта жанданып келеді. Қуаныш бұл дәстүрлі өнерді заманауи сахнаға алып шығуды мақсат етіп отыр. Оның орындауындағы әндерде тек әуезділік қана емес, ұлттық болмыс пен терең мағына да бар. Әрбір шығарманы орындау кезінде ол оның тарихын зерттеп, ерекше ықыласпен жеткізуге тырысады. Музыка арқылы ол тек өнерін ғана емес, халқымыздың рухани байлығын насихаттап келеді.

Өнер жолында ғана емес, білім саласында да биік мақсаттары бар. Қуаныш болашақта Семейдегі жоғары медицина университетіне түсіп, дәрігер болуды армандайды. Бұл жолды таңдауы – бала күнгі арманы мен адамдарға көмек көрсетуді өмірлік мақсаты деп білуімен тығыз байланысты. Дегенмен, ол өнерден де қол үзуді ойламайды, керісінше, оны өмірінің ажырамас бөлігіне айналдырмақ. Оның айтуынша, ұлттық өнерді насихаттау әрбір азаматтың парызы, сондықтан ол медицина саласында жүріп те дәстүрлі ән өнерін дамытуға үлес қосқысы келеді.

Жас өнерпаз спортқа да бейжай қарамайды. Волейболмен шұғылданып, облыстық және республикалық жарыстарға қатысып жүр. Ол үшін спорт – тек денсаулық кепілі ғана емес, мақсатқа жету жолындағы шыдамдылық пен табандылықты қалыптастыратын маңызды құрал. Өнер мен спортты қатар алып жүрген ол өзін жан-жақты дамытуды көздейді. Бұл қасиеттер оны әрдайым алға жетелеп, жаңа мүмкіндіктерге жол ашады.

Қуаныштың өнерге деген сүйіспеншілігі оның отбасынан бастау алады. Бала кезінен әнге әуес болып, домбыраны серік еткен Қуанышқа бұл қасиет ата-бабасынан дарыған. Отбасында ұлттық өнерге деген құрмет жоғары. Ата-анасы да оның таңдаған жолын қолдап, өнерін дамытуға барынша жағдай жасап келеді. Олар үшін Қуаныштың әр жетістігі – отбасының мақтанышы.

Қазіргі таңда Қуаныш түрлі байқауларға қатысып, тәжірибе жинақтауда. Болашақта үлкен сахнада өнер көрсетіп, Қазақстанның атын әлемге танытуды армандайды. Ол еңбек пен талпыныстың жетістікке жеткізетініне сенімді. Ұлттық өнерге деген сүйіспеншілік, білімге құштарлық, спортқа деген қызығушылық – осы үш қасиет оны биік белестерге жетелейтіні сөзсіз.

Ол өз қатарластарына ұлттық өнерді құрметтеуге, мәдени мұраны сақтауға және өз армандарына сеніп, алға ұмтылуға кеңес береді. 

“Қанша биікке көтерілсек те, тамырымызды ұмытпауымыз керек. Қазақтың дәстүрлі музыкасы – біздің рухани байлығымыз, оны келер ұрпаққа жеткізу – біздің міндетіміз” – дейді Қуаныш Амангелді. 

Оның жарқын болашағына сенім мол. Өнер мен білім жолында аянбай еңбек етіп жүрген бұл жас дарын – еліміздің рухани тірегі болар тұлға.