Мьянмадағы жер сілкінісі: қаза тапқандар саны 3 мыңнан асты

Мьянмадағы жойқын жер сілкінісі салдарынан қаза тапқандар саны 3 000-нан асты, деп хабарлайды KazFace.kz.

Бұл туралы "Синьхуа" агенттігі жергілікті билікке сілтеме жасап жазды. Жер сілкінісі тек Мьянмада ғана емес, Қытай мен Таиландтың кейбір аймақтарында да сезілді.

"Мьянмадағы жойқын жер сілкінісі салдарынан 3 003 адам қаза тауып, 4 515 адам жарақат алды, тағы 351 адам із-түзсіз жоғалып кетті", – делінген ресми мәліметте.

Әлеуметтік желілерде апаттың ауқымын көрсететін спутниктік суреттер таралуда. Ғалымдардың мәліметінше, жер қыртысының жарықтары ең үлкен ығысу аймағында анық байқалады. Жарықтың жалпы ұзындығы 500 шақырымды құрайды, ал кейбір жерлерде жер қыртысының ығысуы 5 метрге дейін жеткен.

Бұл жолғы жер сілкінісі халыққа аса ауыр тиді. Мыңдаған ғимарат қирап, жолдар бүлінді, байланыс жүйелері істен шықты. Құтқару жұмыстары әлі де жалғасуда.

Мьянма билігі халықаралық қауымдастықтан көмек сұрады. Бірқатар елдер гуманитарлық көмек көрсетуге дайын екенін мәлімдеді. Апат аймақтарында уақытша баспаналар құрылып, азық-түлік пен медициналық жабдықтар жеткізілуде.

Айта кетейік, жұма, 28 наурыз күні Мьянмада магнитудасы 7,7 және 6,4 балдық жер сілкіністері болды. Жерасты дүмпулері Қытай мен Таиландта да сезілді. Жер сілкінісі соңғы 80 жылдағы ең қуатты зілзала ретінде тарихқа енді.